Wekimün ñi trokiñ:

Itro fill trokiñ ta doy küme amulerpual tüfachi kimün.

Chumuechi tañi kimafel ta pu chilkatufe kishu may ñi fill kimün küpalnielu tañi mapu mew. Fey ti chilkatufe mülepalu ti chilkatuwe mew fey may ta wiño amutualu ñi mapu mew tañi küme adkintuafiel ka femuechi llemay yempüramay tunten tañi kimpan Wekimün Chilkatuwe mew.

Tunte tañi kimpan engün faliltuafingün chew tañi mongelen engün, femuchi may doy küme rakiduamtuyngün tañi küme enturpual itro fill duam mülechi ñi wallontu mew. Chumuechileken reke fillke dungu tañi mapu mew, yamtunien mew ka faliltunien mew ta tunten kimün ñi küpalnien ti pu chilkatufe ka wünümafiel engün, küme rüpü tunte tañi kimfel engün, ka trürümafiel engün tañi kompañ engün.

 

Füta Maudin Rüpü

Küme mongen rüpü tañi kimeltunieken. Epu mari ektaria tüfachi küme mongen rüpü, doy epu kilometro niey alü amun, chew ta kom pu anümka kisuke niey ñi güy ka femuechi ti pichike anümka. Fey ta kiñe füta kimün reke mületuy, chew ta pu chilkatufe kimputukefingün itro fill anümka ka chem mew tañi kümen.

Ka fey chi rüpü mew ti chilkatufe inaramtukey chem tañi kimniefel, chem tañi kimnufel, inaramtuy chem anümka tañi traflanungeken, müley trokiñ mapu chew ta ngillatupeyem, ka chew ta tremochepeyem.

 

Apeche rüpü 

Ina lafken püle, müley kiñe pengewel rüpü, chew ta müley kuyfike rukawe chumuechi tañi mongelekefel kuyfike cheyem apeche pingelu, miyawün mew nagkülechi lafken, malal challwa, ka feley ka müten itro fill mapu püle.

Ti mongen lafken, ka femuechi feley ñi nien itro fill mongen chew mapu rume ina lafken mülelu, fentrentu kachu lafken ka küfüll nielu, kom tüfa ta küme mongen-ngey ka ingekey.

 

Mapu Tukukawe 

Inafül Wekimün ñi ruka, müley ti mapu tukukawe, kiñe füta tukukawe kom güyeltulelu ka femuechi müley itro fill tukukan münche pülastiko mew ka lepün mew mülelu, chew ta ngan-ngekelu itro fill tukukan kümelu ta ingen mew, ka tremochengeal mew, küme rume faliltungekey ta Chilwe ñi mongewe.

Wüchukunungey kiñe pichi mapu chew ta ngen-ngekey kakewme poñi, tüfachi kakewme poñi mew ta pu williche ñi doyüm iyael, ka femuechi müley kekewmechi tukukan ta williche mapu mülelu fey ta chalota pingelu, napor pingelu, awar pingelu; ka müley kiñeke lawen anümka.

Chumuechi tañi küme pünengeken ti mapu, küdawngekey ta mapu füna mew, lafken mew yemengelu kachu lafken, me kulliñ ka itro fill füna tukukan. Ka femuechi, kiñewünkunun-ngey tüfachi fünaltuwe ka piruwe küdaw, femuechi may afkentu müleay ti tukukawe mapu.

Pengel tukukawepeyem küme pefalngey ti itro fill anümka ñi mülen ka inangechi ti pu poñi, küme dillungekey ti poñi fün, tañi doy küme tramam.

 

Lawentuwe ruka 

Ti küme mongen rüpü mawdin mew mülelu, niey tañi kiñewün tüfachi lawentuwe ruka mew, chew ta kimnieken itro fill anümka ka ñi pu trokiñ, tüfachi itro fill anümka lawen-ngekey itro fill kutran mew kuyfi reke ta femkefulu ta pu williche.

 


Dewma iyaelpeyem  

Wekimün ñi ruka mew, kuyfike williche adngey, tüfachi ruka mew akukey itro fill che. Chew ta müley pu adümchefe tañi küdawpeyem, kiñe ipeyem, kiñe pichi ruka lawentuwe ka kiñe wüchuley chew ta puwkey ta che lawentualu.

Pu ruka mew, dewma iyaelpeyem fey mew may amulngekey ta yafütun dungu ka pu chilkatufe kimkimtudungupelu.

 

 

Konsejatu Chafün Williche 

Tüfachi chafün, Konsejatu ñi füta ruka, amuley kiñe kütralwe chew ta yempüramngekey itro fill trawün. Fey ta kiñe kuyfike williche adngey ruka, chew müley kiñe kütralwe, ka kiñe ipeyem, ka kiñe umawtuwe. Tüfachi füta ruka doy kümelkunungey tañi rume ütrenuam ta che ka chew tañi mülen epu trokiñ kimeltuwe chew ta kimkimtukey kom che tüfachi chilkatuwe mew.

Chew ta trawümpeyen ta pu kasike, küme amulngekey ta pu chilkatufe ñi kimkimtun dungu ka itro fill trokiñtu küdaw. Ka femuechi, müley kiñe adümngepeyem williche kewün, chew ta pu adümchefe ka pu chilkatufe küme amulngekey ta williche kewün. 

  

Trokiñ Achawall 

Chew ta mülepeyem achawall niey kiñe umawtupeyem achawall 18 mts2 nielu tüfa mew ta yallümngeay 30 fillke trokiñngechi achawall. Ka femuechi nürüfküley 228 mts2 mapu mew chew ta müley fillke anümka kiñeke ta lawen anümka kakelu feyta gütayam pu achawall.

Tüfachi mülepeyem achawall mew amulngekey kiñe kimeltun dungu femuechi tañi yafütungeal fillke kimün mew ta pu chilkatufe Wekimün Chilkatuwe mew mülepalu kimkeyngün chumuechi tañi yallümngeken achawall, chumuechi tañi lawentungeken ka chumuechi tañi ilelngeken ti trokiñ achawall ka femuechi ñi günaituniengeal mapu achawall.

Tüfachi kimeltuwe mew ti chilkatufe Wekimün Chilkatuwe mew mülepalu kimpakey kakewmechi fill kimün fey mew ta konküley Williche küpan ngen ka femuechi kimeltun kimün Williche kewün mew.

 

Fitrümpuyemwe 

Tüfachi kütralwe kimeltupeyem fey may ta kiñe ruka 30 mts2 nielu chew ta fitrumngekey fillke ilo kulliñ ka femuechi fillke kufüll lafken mew tripalu.

Chem dungu tañi ditungeal tüfachi kimeltun kimün mew fey may ta chumuechi ta kuyfike che ñi gülümkunukefel fillke iyael rupakunüwma fitrun mew ka femuechi fillke yafütukechi iyael rume kümelu ta küme mongen yeniealu ta pu Williche.

 

 

 

 

 

CHEW TAIÑ

MÜLEN

Chafün Williche 

TAIÑ TRAWÜWPEYEM

Nieiñ kiñe füta kütralwe trawüpeyem ka küdawpeyem.

 

Nieiñ kiñe laboratorio adümngepeyem williche kewün

NIEIÑ ITRO FILL EKIPAMIENTO

12 komputador weluke trapümüwkülelu, micrófonos, audífonos ka pantalla táctil.

 

Nieiñ kiñe laboratorio dewmangepeyem lawen

DEWMANGEPEYEM MAPU LAWEN

Nieiñ itro fill chemkün dewmangepeyem lawen, maserangepeyem ka chew ta tukungepeyem ti itro fill lawen.

 

Kimngepeyem itro fill küdaw

KIMKIMTUPEYEM MAPU MEW

Küme mongen rüpü, eñum tukukawe ka fillke tukukwe chew ta pu chilkatufe adümkeyngün itro fill küdaw.

 

“Wekimün Chilkatuwe ruka ta küme amulniele ti kimeltun dungu ka antü ta doyeltungeay ta ñamnagnuam williche machulla”.